Activi MED: მიმოხილვა, დაყენება და პირველი გაშვება

Activi MED არის ამბულატორიული კლინიკის მართვის პროგრამა: პაციენტების რეესტრი და ელექტრონული ბარათი, ექიმების კალენდარი კაბინეტებით, ვიზიტი (ფორმა №025) დიაგნოზით დსკ-10-ის მიხედვით, სერვისები და ფასები, დაზღვევა და თანაგადახდა, სალარო — გადახდა, ავანსი და დავალიანება, სადაზღვევო კომპანიის ინვოისი, ლაბორატორია, რეცეპტი, მიმართვა, ფორმები IV-100/ა და IV-200-ა, ფაილები და DICOM, SMS შეხსენებები, ექიმების საკომისიო, ანგარიშები და აუდიტის ჟურნალი — ერთ ფანჯარაში. ნაწილი მათგანი პაკეტზეა დამოკიდებული (თავი პაკეტები).

ეს სახელმძღვანელო აღწერს ვერსიას 2.38. ყველა სურათი და ციფრი აღებულია ნამდვილი პროგრამიდან — სანიმუშო კლინიკიდან სამედიცინო ცენტრი „ცისფერი ხიდი“, რომელიც ორი თვე „მუშაობდა“ (3 აგვისტო – 2 ოქტომბერი 2026): ექვსი ექიმი, ორი რეგისტრატორი, ექთანი და ლაბორანტი, დაახლოებით 1 140 ვიზიტი და 690 პაციენტი, ოთხი მზღვეველი, ყოველდღიური სალაროს დახურვა, აგვისტოს სადაზღვევო ინვოისები და მათი ანაზღაურება. ყოველი თანხა პროგრამამ თავად დაითვალა. პაციენტების სახელები, პირადი ნომრები (000…), ტელეფონები და დიაგნოზები გამოგონილია.

მთავარი ცნებები

ყოველი გადახდა ჩვეულებრივი ჩეკია: შედის დღის სალაროში (X/Z-რეპორტი), იბეჭდება ჩეკის პრინტერზე და თავისით ტარდება ბუღალტერიაში.

სისტემური მოთხოვნები

• ოპერაციული სისტემა: Windows 10 ან Windows 11, 64-ბიტიანი.
• დამატებითი პროგრამები: არ სჭირდება — მონაცემთა ბაზა პროგრამაშივეა ჩაშენებული.
• ინტერნეტი: ყოველდღიური მუშაობა ინტერნეტის გარეშეც შეიძლება. ინტერნეტი საჭიროა ლიცენზიისთვის, განახლებებისთვის, ზუსტი დროისთვის, RS.ge-დან სახელის მოძებნისთვის, SMS-ისთვის, ონლაინ ჩაწერისთვის და დახმარების მოთხოვნისთვის.
• აპარატურა (არასავალდებულო): ჩეკის პრინტერი, A4 პრინტერი (ვიზიტის ფურცელი, ფორმები, რეცეპტი, ინვოისი), ბარათის ტერმინალი; რეგისტრატურის, ექიმების და ლაბორატორიის კომპიუტერები — იმავე ქსელში (თავი ქსელი და ბაზები).

დაყენება

1. ჩამოტვირთეთ ინსტალერი გვერდიდან activi.ge/download. ფაილს ჰქვია Activi-MED-Setup-ვერსია.exe (მაგალითად Activi-MED-Setup-2.38.0.exe).
2. გაუშვით ფაილი. თუ Windows იკითხავს ნებართვას, დაადასტურეთ.
3. წაიკითხეთ და მიიღეთ სალიცენზიო შეთანხმება.
4. საჭიროებისას შეცვალეთ დაყენების საქაღალდე (ჩვეულებრივ ნაგულისხმევი ჯობს).
5. დაასრულეთ. სამუშაო მაგიდაზე და Start მენიუში ჩნდება მალსახმობი „Activi MED“ და პროგრამა თავისით იხსნება.

შენიშვნა: ინსტალერი თან აყენებს Activi Remote-ს — დისტანციური დახმარების პროგრამას (თუ კომპიუტერზე უკვე არის, მეორედ აღარ დგება). რისთვის გამოიყენება — თავი დახმარება და Activi Remote.

პირველი გაშვება: ახალი, დემო თუ არსებული ბაზა

Activi MED ყოველთვის საკუთარ ბაზაზე მუშაობს (Activi POS-ის მაღაზიის ბაზას არ ეხება). პირველ გაშვებაზე პროგრამა გეკითხებათ: „მოგესალმებით! როგორ დავიწყოთ Activi MED?“ სამი ღილაკით:

დემოთი ვარჯიშის შემდეგ სამუშაო ბაზას შექმნით „პარამეტრები“ → „მონაცემები“ → „ბაზები“ → „ახალი ბაზა“ (თავი ქსელი და ბაზები).

სად ინახება მონაცემები: %APPDATA%\CloudPos\data-cloudmed (დემო და დამატებითი ბაზები — იქვე, db-1, db-2… საქაღალდეებში). პაციენტების ფაილები, სკანები, DICOM, ხელმოწერები და ბეჭდები — ბაზის საქაღალდეში, med-docs. პროგრამის წაშლა ან განახლება ბაზას არ შლის.

შესვლა

1. ველში „მომხმარებელი“ აკრიფეთ შესასვლელი სახელი ან დააჭირეთ ისარს და აირჩიეთ თავი სიიდან.
2. ველში „პაროლი“ აკრიფეთ პაროლი. სენსორულ ეკრანზე დააჭირეთ ბადის ხატულას — გამოჩნდება ციფრების კლავიატურა; „თვალის“ ღილაკი აჩვენებს აკრეფილს.
3. „დამახსოვრება“ ამ კომპიუტერზე იმახსოვრებს მომხმარებლის სახელს.
4. დააჭირეთ „შესვლა“ (ან Enter).

ქვედა ველი „ბაზა / სერვერი“ აჩვენებს, რომელ ბაზაზე შედიხართ; ზედა მარჯვენა ⚙ ღილაკი ხსნის „სერვერების კონფიგურაციას“ (ქსელისთვის). მარცხნივ წერია: „კლინიკის მართვა — პაციენტები, ვიზიტები, ექიმების განრიგი და დაზღვევა.“

საწყისი მომხმარებლები

კლინიკაში რიგით თანამშრომელს „რეგისტრატორი“ ჰქვია (სხვა პროგრამებში — „მოლარე“). ექიმის, ექთნისა და ლაბორანტის ანგარიშებს ადმინისტრატორი ქმნის (თავი თანამშრომლები და როლები).

ყურადღება: საწყისი პაროლები ყველასთვის ცნობილია და პროგრამა მათ შეცვლას არ გაიძულებთ. კლინიკაში ეს განსაკუთრებით მნიშვნელოვანია — ბაზაში პაციენტების ჯანმრთელობის მონაცემებია. პირველივე დღეს შეცვალეთ ისინი („ჩემი პროფილი“ → „პაროლის შეცვლა“) და თითოეულ თანამშრომელს შეუქმენით საკუთარი ანგარიში: აუდიტის ჟურნალი სწორედ ამით აჩვენებს, ვინ ნახა და ვინ შეცვალა პაციენტის ბარათი.

შესვლის შეცდომები

• „მომხმარებლის სახელი ან პაროლი არასწორია“ — შეამოწმეთ ორივე.
• „კლავიატურა ქართულზეა…“ — სახელი და პაროლი ლათინურად იკრიფება; გადართეთ კლავიატურა.
• 5 არასწორი ცდის შემდეგ ანგარიში 15 წუთით იბლოკება; ადმინისტრატორს შეუძლია ბლოკი მოხსნას („თანამშრომლები“ → „ბლოკის მოხსნა“).
• „ანგარიში დეაქტივირებულია“ — ადმინისტრატორმა ანგარიში გამორთო.
• „ამ კომპიუტერისთვის ადგილი არ არის“ — ლიცენზიის სამუშაო ადგილები შევსებულია (თავი ლიცენზია).

შესვლის შემდეგ ყველა — ლაბორანტის გარდა — „დღეს“ გვერდს ხედავს; ლაბორანტი პირდაპირ „ლაბორატორიაში“ შედის. პროგრამა სრულ ეკრანზე იხსნება (F11 — ჩართვა/გამორთვა).

პირველი დღის გეგმა

1. „პარამეტრები“ → „მაღაზია“: კლინიკის დასახელება, მისამართი, ტელეფონი, ს/კ — ისინი იბეჭდება ჩეკზე, ინვოისზე და ფორმებზე (თავი ბეჭდვა, პრინტერი და ტერმინალი).
2. „კლინიკის პარამეტრები“ → „კლინიკა“: იურიდიული დასახელება, სამედიცინო საქმიანობის ლიცენზიის №, დირექტორი, სამუშაო დღე, ბანკი და IBAN, კლინიკის ბეჭედი (თავი კლინიკის პარამეტრები).
3. „ორგანიზაცია“: განყოფილებები, სპეციალობები, კაბინეტები; „ექიმები“: ექიმის ბარათი, სამუშაო საათები, ხელმოწერა (თავი ექიმები და სამუშაო საათები).
4. თანამშრომლები: რეგისტრატორები, ექიმები, ექთანი, ლაბორანტი; საწყისი პაროლების შეცვლა.
5. „სერვისები“: ფასების სია (ხელით ან Excel-იდან) და ლაბორატორიის ცნობარი (თავები სერვისები და ფასები, ლაბორატორია).
6. „დაზღვევა“: მზღვეველები, პროცენტები და ლიმიტები ხელშეკრულებების მიხედვით (თავი დაზღვევა და თანაგადახდა).
7. სცადეთ: ჩაწერეთ პაციენტი, მონიშნეთ „მოვიდა“, შეავსეთ ვიზიტი, მიიღეთ გადახდა (თავი სრული მაგალითი).

რას შეიცავს სახელმძღვანელო

1. დასაწყისი: პროგრამის ფანჯარა და როლები, პაკეტები, კლინიკის პარამეტრები, ექიმები და სამუშაო საათები, სერვისები და ფასები, დაზღვევა და თანაგადახდა.
2. პაციენტი და ვიზიტი: პაციენტები და ელ. ბარათი, ექიმების კალენდარი, ვიზიტი და სამედიცინო ჩანაწერი, რეცეპტი, მიმართვა, თანხმობა, ფორმები, ლაბორატორია, ფაილები და DICOM.
3. ფული: სალარო: გადახდა, ავანსი, დავალიანება, სადაზღვევო ინვოისები, სრული მაგალითი: ვიზიტი თანაგადახდით, სალაროს დახურვა, ანგარიშები, ექიმის თვის გამომუშავება.
4. კავშირი და სახელმწიფო: SMS და ონლაინ ჩაწერა, HMIS, EHR და ელ. რეცეპტი.
5. ადმინისტრირება: თანამშრომლები და როლები, აუდიტი და კონფიდენციალობა, ბეჭდვა, პრინტერი და ტერმინალი, ქსელი და ბაზები, ბექაპი, ლიცენზია, განახლებები, დახმარება, ბუღალტერია, ხშირი კითხვები.