ბექაპი: ავტომატური ასლები, სარეზერვო ფაილი, პაციენტების ფაილები, აღდგენა და კომპიუტერის შეცვლა

ყველაფერი ამ თავში არის „პარამეტრები“ → „მონაცემები“ (ადმინისტრატორი; ქსელში — მთავარ კომპიუტერზე, სადაც ბაზაა).

რა სად ინახება

ბაზის საქაღალდე %APPDATA%\CloudPos\data-cloudmed:

ავტომატური ბექაფი

პროგრამა ყოველდღე (და ჩართვისას) ქმნის ბაზის სრულ ასლს იმავე კომპიუტერზე — backups-ში. ინახება ბოლო 14 დღიური ასლი.

ბარათი „ავტომატური ბექაფი“: „ბოლო ბექაფი“, „შენახული ასლები“, „ბექაფის შექმნა ახლა“ (მაგ. ფასების დიდი ცვლილების ან იმპორტის წინ), ასლების სია და ღილაკი „აღდგენა“.

აღდგენა ავტომატური ასლიდან

1. დარწმუნდით, რომ სხვა კომპიუტერებზე ამ დროს არავინ მუშაობს.
2. სასურველ ასლთან — „აღდგენა“ → დაადასტურეთ („მიმდინარე ბაზის ასლი ჯერ შეინახება…“).
3. „ბაზა აღდგა ასლიდან … — შედით ხელახლა“.

ყურადღება: ასლის შემდეგ გაკეთებული რეგისტრაციები, ჩაწერები, ვიზიტები, ჩანაწერები, ანალიზის პასუხები და გადახდები აღდგენისას ქრება (აღდგენამდე მდგომარეობა „აღდგენამდე“ ასლად რჩება). აღდგენამდე ჩაიწერეთ ბოლო საათების მონაცემები ან დაგვიკავშირდით.

სარეზერვო ფაილი

ბარათი „მონაცემები“:

• „სარეზერვო ასლი“ → „ჩამოტვირთვა“ — cloudpos-backup_თარიღი.json: ყველა ცხრილი (პაციენტები, ვიზიტები, ანალიზები, დაზღვევა, ფული, თანამშრომლები, ბუღალტერია). ფაილში არ შედის ლიცენზია, RS.ge-ს სერვის-იუზერი, ტერმინალების პარამეტრები და პაციენტების ფაილები.
• „აღდგენა“ → „ფაილის ატვირთვა“ — ყველა მიმდინარე მონაცემი ფაილით ჩანაცვლდება (მიმდინარე ბაზის ასლი ჯერ ინახება).
• „თემა“ — ღია / მუქი.

ყურადღება: სარეზერვო ფაილი დაუშიფრავია და შეიცავს ყველა პაციენტის მონაცემს, მათ შორის დიაგნოზებს — და, თუ შეყვანილია, SMS პროვაიდერის გასაღებს და HMIS-ის პაროლს. შეინახეთ ის დაშიფრულ დისკზე ან სეიფში და ელ-ფოსტით ნუ გაგზავნით.

პაციენტების ფაილები (med-docs)

სკანები, სურათები, PDF, DICOM, ექიმების ხელმოწერები, კლინიკის ბეჭედი და ხელმოწერილი თანხმობების ხელმოწერები ინახება ცალკე საქაღალდეში med-docs და არც ერთ ასლში არ შედის — არც ავტომატურში, არც სარეზერვო ფაილში, არც Activi-ის სერვერზე გაგზავნილში. ბაზაში მათი მხოლოდ სახელია.

პერიოდულად (მაგ. კვირაში ერთხელ) დააკოპირეთ მთელი საქაღალდე data-cloudmed — cloudpos.db-ით და med-docs-ით ერთად — USB დისკზე ან სხვა დაცულ ადგილას. ჯერ დახურეთ პროგრამა სრულად (ტრეი → „სრულად გამორთვა“). რამდენ ადგილს იკავებს — „კლინიკის პარამეტრები“ → „კლინიკა“ → „ფაილების საცავი“.

დაშიფრული ასლი Activi-ის სერვერზე

ლიცენზიის მიბმის შემდეგ პროგრამა დღეში ერთხელ აგზავნის ამ კომპიუტერზევე დაშიფრულ ბაზის ასლს Activi-ის სერვერზე (ბოლო 14). ეს გადაგარჩენთ, თუ კომპიუტერი გაფუჭდა ან მოიპარეს; აღდგენისთვის დაგვიკავშირდით. პაციენტების ფაილები ამ ასლშიც არ შედის.

ბაზის სრული განულება

ბარათი „ბაზის სრული განულება“ შლის ყველაფერს (პაციენტები, ვიზიტები, ფული, ბუღალტერია, თანამშრომლები); რჩება ლიცენზია და პრინტერის პარამეტრები. „განულება“ → ეკრანზე ნაჩვენები ციფრები → „სამუდამოდ წაშლა“. განულებამდე ასლი ინახება („გასუფთავებამდე“).

რჩევა: დემოთი ვარჯიშისთვის განულება საჭირო არ არის — შექმენით ცალკე დემო ბაზა (თავი ქსელი და ბაზები), სამუშაო ბაზა კი ხელუხლებელი დარჩება.

კომპიუტერის შეცვლა

1. ძველ კომპიუტერზე დახურეთ პროგრამა სრულად (ტრეი → „სრულად გამორთვა“) და დააკოპირეთ მთელი საქაღალდე %APPDATA%\CloudPos\data-cloudmed (cloudpos.db, med-docs და დანარჩენი).
2. ახალზე დააყენეთ Activi MED და პირველ გაშვებაზე აირჩიეთ „არსებული ბაზა…“ → საქაღალდე (ან „ბაზები“ → „არსებული ბაზის დამატება“).
3. ლიცენზია: ძველზე „ლიცენზიის გათავისუფლება ამ კომპიუტერიდან“, ახალზე — იგივე კოდი (თავი ლიცენზია).
4. სხვა კომპიუტერებზე შეცვალეთ მთავარი კომპიუტერის მისამართი (ახალი IP).

სარეზერვო ფაილით (JSON) გადატანაც შეიძლება, მაგრამ მაშინ med-docs ცალკე გადაიტანეთ ახალი ბაზის საქაღალდეში — თორემ ფაილები ბარათებზე არ გაიხსნება („ფაილი დისკზე ვერ მოიძებნა“).