ბექაპი: ავტომატური ასლები, სარეზერვო ფაილი, აღდგენა და კომპიუტერის შეცვლა

ყველაფერი ამ თავში არის „პარამეტრები“ → „მონაცემები“ (ადმინისტრატორი; ქსელში — მთავარ კომპიუტერზე, სადაც ბაზაა).

ავტომატური ბექაფი

პროგრამა ყოველდღე (და ჩართვისას) ქმნის ბაზის სრულ ასლს იმავე კომპიუტერზე — ბაზის საქაღალდის ქვესაქაღალდეში backups (მაგ. %APPDATA%\CloudPos\data\backups). ინახება ბოლო 14 დღიური ასლი.

ბარათი „ავტომატური ბექაფი“: „ბოლო ბექაფი“, „შენახული ასლები“, „ბექაფის შექმნა ახლა“ (მაგ. ფასების ან ოთახების დიდი ცვლილების წინ), ასლების სია სახეობით — „დღიური“, „ხელით“, „აღდგენამდე“, „გასუფთავებამდე“ — და ღილაკი „აღდგენა“.

აღდგენა ავტომატური ასლიდან

1. დარწმუნდით, რომ სხვა კომპიუტერებზე და ტაბლეტებზე ამ დროს არავინ მუშაობს.
2. სასურველ ასლთან — „აღდგენა“ → დაადასტურეთ („მიმდინარე ბაზის ასლი ჯერ შეინახება…“).
3. „ბაზა აღდგა ასლიდან … — შედით ხელახლა“.

ყურადღება: ასლის შემდეგ გაკეთებული ჯავშნები, შესახლებები, ავანსები და გაწერები აღდგენისას ქრება (აღდგენამდე მდგომარეობა „აღდგენამდე“ ასლად რჩება). სასტუმროში ეს ნიშნავს დაკარგულ ჯავშნებს — აღდგენამდე ჩაიწერეთ ბოლო საათების ჯავშნები (კალენდრიდან), ან დაგვიკავშირდით. ავტომატური ასლები იმავე კომპიუტერზეა — დისკის გაფუჭებისას ისინიც დაიკარგება; პერიოდულად ჩამოტვირთეთ სარეზერვო ფაილი და შეინახეთ სხვაგან.

სარეზერვო ფაილი

ბარათი „მონაცემები“:

• „სარეზერვო ასლი“ → „ჩამოტვირთვა“ — cloudpos-backup_თარიღი.json: ოთახები, ტიპები, სეზონები, სტუმრები, ჯავშნები, ფოლიოები, ჩეკები, მენიუ და საწყობი, თანამშრომლები, ბუღალტერია. ფაილში არ შედის ლიცენზია, RS.ge-ს სერვის-იუზერი და ტერმინალების პარამეტრები.
• „აღდგენა“ → „ფაილის ატვირთვა“ — ყველა მიმდინარე მონაცემი ფაილით ჩანაცვლდება (მიმდინარე ბაზის ასლი ჯერ ინახება).
• „თემა“ — ღია / მუქი.

ყურადღება: სარეზერვო ფაილში სტუმრების პერსონალური მონაცემებია (დოკუმენტის ნომრები, ტელეფონები). შეინახეთ ის დაცულ ადგილას და ელ-ფოსტით ნუ გაგზავნით.

დაშიფრული ასლი Activi-ის სერვერზე

ლიცენზიის მიბმის შემდეგ პროგრამა დღეში ერთხელ აგზავნის ამ კომპიუტერზევე დაშიფრულ ასლს Activi-ის სერვერზე (ბოლო 14). ეს გადაგარჩენთ, თუ კომპიუტერი გაფუჭდა ან მოიპარეს; აღდგენისთვის დაგვიკავშირდით.

ბაზის სრული განულება

ბარათი „ბაზის სრული განულება“ შლის ყველაფერს (ჯავშნები, სტუმრები, ჩეკები, მენიუ, საწყობი, ბუღალტერია, თანამშრომლები); რჩება ლიცენზია და პრინტერის პარამეტრები. „განულება“ → (სურვილისამებრ „მაღაზიის პარამეტრები დარჩეს…“) → ეკრანზე ნაჩვენები ციფრები → „სამუდამოდ წაშლა“. განულებამდე ასლი ინახება („გასუფთავებამდე“).

რჩევა: დემოთი ვარჯიშისთვის განულება საჭირო არ არის — შექმენით ცალკე დემო ბაზა (თავი ქსელი, ტაბლეტები და ბაზები), სამუშაო ბაზა კი ხელუხლებელი დარჩება.

კომპიუტერის შეცვლა

1. ძველ კომპიუტერზე ჩამოტვირთეთ სარეზერვო ფაილი (ან დააკოპირეთ ბაზის საქაღალდე %APPDATA%\CloudPos\data — ტრეიდან „სრულად გამორთვის“ შემდეგ).
2. ახალზე დააყენეთ Activi Hotel; აღადგინეთ ფაილი („მონაცემები“ → „აღდგენა“) ან დაამატეთ საქაღალდე („ბაზები“ → „არსებული ბაზის დამატება“).
3. ლიცენზია: ძველზე „ლიცენზიის გათავისუფლება ამ კომპიუტერიდან“, ახალზე — იგივე კოდი (თავი ლიცენზია).
4. სხვა კომპიუტერებსა და ტაბლეტებზე შეცვალეთ მთავარი კომპიუტერის მისამართი (ახალი IP).