პროგრამის ფანჯარა: მენიუ, ზედა ზოლი და კლავიატურის მალსახმობები

ამ თავში აღწერილია მთავარი ფანჯარა: სად რა არის, რას ხედავს თითოეული როლი და როგორ მოვარგოთ ფანჯარა სამუშაოს.

გვერდითა მენიუ

მენიუ ჯგუფებადაა დაყოფილი. რომელ პუნქტს ხედავს თანამშრომელი, დამოკიდებულია მის როლზე (და ადმინისტრატორის მიერ მიცემულ წვდომაზე — თავი თანამშრომლები):

მოლარე ხედავს მხოლოდ სამუშაო გვერდებს: შემოსვლები, სტუმრები, ბარათები, კაფე / სალარო, ჩეკები, სალაროს დახურვა და ჩემი პროფილი.

მენიუს ბოლოში ჩანს ბაზის სტატუსი („აქტიური · ლოკალური ბაზა“ ან „ქსელის ბაზა · …“) და ვერსიის სტრიქონი „Activi გასართობი ცენტრი v2.38.0 · შემოწმება“ — დაჭერით პროგრამა ახალ ვერსიას ამოწმებს (თავი განახლებები).

მენიუს ჩაკეცვა

ლოგოს გვერდით ღილაკი მენიუს სამ მდგომარეობას შორის ცვლის:

1. სრული — ხატულები და წარწერები;
2. ხატულები — ვიწრო ზოლი („მენიუს ჩაკეცვა (აიკონები)“) — დაფას მეტი ადგილი რჩება;
3. დამალული („მენიუს დამალვა“) — მენიუ ქრება, ზედა ზოლში ჩნდება ☰ „მენიუ“, რომელიც მენიუს გვერდის თავზე ხსნის.

არჩეული მდგომარეობა ამ კომპიუტერზე ინახება.

ზედა ზოლი

მარცხნიდან მარჯვნივ:

• გვერდის სათაური — სად იმყოფებით;
• საათი და თარიღი — პროგრამის დრო (ზუსტი დროის სერვერით შემოწმებული, იხ. ქვემოთ). შემოსვლების ტაიმერებიც ამ დროს ითვლის;
• დახმარება (სამაშველო რგოლის ხატულა) — შეტყობინება მხარდაჭერისთვის (თავი დახმარება);
• თემის შეცვლა (მთვარე / მზე) — მუქი და ღია თემა;
• თქვენი სახელი და როლი — დაჭერით იხსნება „ჩემი პროფილი“;
• გასვლა — სისტემიდან გამოსვლა.

ზოლის ქვემოთ საჭიროებისას ჩნდება შეტყობინებები: საცდელი პერიოდის ან ლიცენზიის ვადის შესახებ, ახალი ვერსიის შესახებ და (ადმინისტრატორისთვის) — „ჩეკზე მაღაზიის რეკვიზიტები არ იბეჭდება — შეავსეთ: მისამართი, ტელეფონი, საიდენტიფიკაციო კოდი“ ღილაკებით „შევსება →“ და „მოგვიანებით“. შეავსეთ ისინი „პარამეტრები“ → „მაღაზია“ გვერდზე.

მიმოხილვა

ადმინისტრატორი და მენეჯერი გვერდზე „მიმოხილვა“ ხედავენ: დღევანდელ შემოსავალს, ჩეკების რაოდენობას, საშუალო ჩეკს და მოგებას (გუშინდელთან შედარებით), ბოლო 14 დღის გრაფიკს, დღევანდელ გადახდის მეთოდებს, ბოლო გაყიდვებს, ტოპ პროდუქციას და მარაგს, რომელიც იწურება. ღილაკი „შემოსვლების დაფა →“ პირდაპირ დაფაზე გადაგიყვანთ. დაწვრილებით — თავი სტატისტიკა და ანგარიშები.

მუქი თემა

ზედა ზოლის მთვარის ღილაკი რთავს მუქ თემას, მზის ღილაკი — ღიას. პირველად პროგრამა Windows-ის პარამეტრს მიჰყვება, შემდეგ არჩეული თემა ამ კომპიუტერზე ინახება. იგივე გადამრთველია „პარამეტრები“ → „მონაცემები“ → „თემა“.

სრული ეკრანი

შესვლის შემდეგ პროგრამა მთელ ეკრანს იკავებს; F11 სრულ ეკრანს რთავს და თიშავს. რომ პროგრამა სრულ ეკრანზე საერთოდ არ გაიხსნას, გამორთეთ „პარამეტრები“ → „სალაროს ვიზუალი“ → „ეკრანი“ → „სრულ ეკრანზე გაშვება“.

კლავიატურის მალსახმობები

შტრიხკოდის სკანერი პროგრამისთვის სწრაფი კლავიატურაა: კაფეს სალაროზე სკანირება ნებისმიერ მომენტში მუშაობს, ხოლო შემოსვლების ფორმაში სკანერით შეგიძლიათ ჩაწეროთ სამაჯურის ან კლიენტის ბარათის კოდი — ჯერ დააჭირეთ შესაბამის ველს.

შენიშვნა: პროგრამის ენა ქართულია; ენის ან შრიფტის ზომის ცალკე პარამეტრი არ არის.

პროგრამის დრო

ჩეკების, ვიზიტებისა და ტაიმერების დრო პროგრამის საათით ითვლება, რომელიც ზუსტი დროის სერვერით მოწმდება (ნაგულისხმევად time.google.com, ყოველ 30 წუთში) — ასე ბავშვის დრო სწორად ითვლება მაშინაც, როცა კომპიუტერის საათი ჩამორჩება. მდგომარეობა ჩანს „პარამეტრები“ → „მონაცემები“ → ბარათში „დრო“: „პროგრამის დრო“, „კომპიუტერის საათი“ და „წყარო“. იქვე შეიძლება სხვა დროის სერვერის ჩაწერა („შენახვა და შემოწმება“), ხელით „შემოწმება“ ან შემოწმების „გამორთვა“.