მონაცემთა ბაზები, რამდენიმე სალარო ქსელში და სერვერი ფონზე
Activi POS-ის მონაცემთა ბაზები: ცალკე ბაზა თითო ბიზნესისთვის, რამდენიმე სალარო ერთ ბაზაზე ლოკალურ ქსელში, ქსელში ძებნა, ბაზების გადართვა და მთავარი კომპიუტერის ფონზე მუშაობა ფანჯრის დახურვისას (2.38).
Activi POS-ის ყველა მონაცემი — პროდუქცია, გაყიდვები, თანამშრომლები, ბუღალტერია — ინახება მონაცემთა ბაზაში. ბაზა ერთ კომპიუტერზეა, მაგრამ მასზე ერთდროულად რამდენიმე სალარო შეიძლება მუშაობდეს ლოკალური ქსელით.
ძირითადი ცნებები
- ბაზა — ერთი ბიზნესის ან ფილიალის ყველა მონაცემი. თითოეული ბაზა ცალკეა: საკუთარი პროდუქციით, თანამშრომლებით და ბუღალტერიით.
- მთავარი კომპიუტერი (სერვერი) — სადაც ბაზა ინახება. ის ჩართული უნდა იყოს, როცა სხვა სალაროები მუშაობენ.
- სალარო (კლიენტი) — კომპიუტერი, რომელიც საკუთარ ბაზას არ იყენებს და მთავარ კომპიუტერს ქსელით უკავშირდება.
პირველ გაშვებაზე პროგრამა ამ კომპიუტერზე ქმნის „მთავარ ბაზას“ (%APPDATA%\CloudPos\data, ქსელის პორტი 3030) — ერთი სალაროს შემთხვევაში სხვა არაფერია გასაკეთებელი.
რამდენიმე სალარო ერთ ბაზაზე
- მთავარ კომპიუტერზე Activi POS ჩართული უნდა იყოს. თუ Windows-მა იკითხა „Allow access“, დაადასტურეთ.
- დააყენეთ Activi POS მეორე კომპიუტერზე (სალაროზე).
- სალაროს შესვლის ფანჯარაში ველში „ბაზა / სერვერი“ აირჩიეთ მთავარი კომპიუტერი ჯგუფიდან „ქსელის სერვერები“. თუ ის სიაში არ ჩანს, აირჩიეთ „+ სერვერის დამატება…“, ჩაწერეთ მთავარი კომპიუტერის მისამართი (მაგალითად
192.168.1.10) და დააჭირეთ „დაკავშირება“. - პროგრამა გადაიტვირთება და სალარო მთავარი კომპიუტერის ბაზით იმუშავებს — იგივე თანამშრომლებით, პროდუქციით და გაყიდვებით.

იგივე შეიძლება უკვე შესულ სალაროზეც: „პარამეტრები“ → „მონაცემები“ → „ბაზები“ → „ქსელში ძებნა“. გამოჩნდება ფანჯარა „ქსელში არსებული ბაზები“ — დააჭირეთ საჭირო ბაზასთან „დაკავშირება“. მისამართის ჩაწერაც შეიძლება ველში „ან მისამართით“.
როცა კომპიუტერი სხვის ბაზაზე მუშაობს, მენიუს ბოლოში წერია „აქტიური · ქსელის ბაზა · …“ (საკუთარ ბაზაზე — „აქტიური · ლოკალური ბაზა“), ბარათში „ბაზები“ კი — „ეს კომპიუტერი მუშაობს სხვა კომპიუტერის ბაზაზე: …“ და ჩანს ღილაკი „ამ კომპიუტერის ბაზაზე დაბრუნება“.
ტაბლეტი ან ტელეფონი
მთავარი კომპიუტერის ბაზა იხსნება ბრაუზერითაც იმავე ქსელში: აკრიფეთ http://მთავარი-კომპიუტერის-IP:3030 (მაგალითად http://192.168.1.10:3030). ზოგი შესაძლებლობა (USB პრინტერზე პირდაპირ ბეჭდვა, ბაზების მართვა, დისტანციური დახმარება) მხოლოდ დაინსტალირებულ პროგრამაშია.
სერვერი ფონზე (2.38)
2.38-დან მთავარი კომპიუტერი სალაროებს აღარ თიშავს, როცა მის ფანჯარას ✕-ით ხურავთ: პროგრამა იმალება ტრეიში (ხატულა საათთან) და ბაზა მუშაობას აგრძელებს. პირველად ჩნდება შეტყობინება „Activi ფონზე მუშაობს — სალაროები დაკავშირებული რჩება“.
- გახსნა — დააჭირეთ ტრეის ხატულას (ან მის მენიუში „გახსნა“).
- სრულად გამორთვა — ტრეის ხატულა → მარჯვენა ღილაკი → „სრულად გამორთვა“. თუ ამ დროს სხვა სალაროები მუშაობენ, პროგრამა გაგაფრთხილებთ: „N სალარო მუშაობს ამ ბაზაზე — გაჩერდებიან“.
პარამეტრები: „პარამეტრები“ → „მონაცემები“ → ბარათი „ქსელის სერვერი — ფონზე მუშაობა“:
| პარამეტრი | ვარიანტები | „ავტომატურად“ ნიშნავს |
|---|---|---|
| ფანჯრის დახურვისას — ფონზე მუშაობა | ავტომატურად / ჩართული / გამორთული | ✕ ფანჯარას მალავს, თუ ეს კომპიუტერი სხვების სერვერია (ბოლო კვირაში მას სხვა კომპიუტერები დაუკავშირდნენ, ან რომელიმე ბაზა „ქსელში ყოველთვისაა“); სხვა შემთხვევაში ✕ პროგრამას თიშავს |
| Windows-თან ერთად ჩართვა (ფონზე) | ავტომატურად (სერვერზე) / ჩართული / გამორთული | კომპიუტერის ჩართვისას პროგრამა ფონზე ჩაირთვება, თუ ის სერვერია |
ბარათი აჩვენებს მიმდინარე მდგომარეობას, მაგალითად „ეს კომპიუტერი სხვა კომპიუტერების სერვერია (ბოლო დღეებში დაკავშირებული: 2, ახლა: 2)…“ და „ახლა: ✕ ფანჯარას მალავს, ბაზა მუშაობს“. ერთადერთ სალაროზე (სადაც სხვები არ უკავშირდებიან) ✕ პროგრამას ჩვეულებრივ თიშავს, სანამ სხვა სალაროები არ დაუკავშირდება.

სალარო-კომპიუტერზე (რომელიც სხვის ბაზას იყენებს) ✕ ჩვეულებრივ თიშავს პროგრამას — ეს ბარათი იქ არ ჩანს.
რჩევა: მთავარ კომპიუტერზე დატოვეთ ორივე პარამეტრი „ავტომატურად“ — მაშინ კომპიუტერის ჩართვისას სერვერი თავისით ჩაირთვება ფონზე, სალაროები დილით უპრობლემოდ დაუკავშირდებიან, ხოლო დღის ავტომატური დახურვა 00:00-ზე შესრულდება (თავი სალარო და დღის დახურვა).
თუ მთავარი კომპიუტერი გამორთულია
სალარო ჩართვისას დაახლოებით 45 წამის განმავლობაში ცდილობს მთავარ კომპიუტერთან დაკავშირებას („მთავარ კომპიუტერს ვუკავშირდები…“). თუ ვერ დაუკავშირდა, ის ხსნის საკუთარ ცალკე ბაზას და შესვლის ფანჯარაში აჩვენებს: „მთავარ კომპიუტერთან (…) კავშირი ვერ დამყარდა — ახლა ამ კომპიუტერის ცალკე ბაზაა გახსნილი — თქვენი მომხმარებლები და პაროლები აქ არ არის…“. ჩართეთ მთავარი კომპიუტერი, შეამოწმეთ ქსელი და დააჭირეთ „ხელახლა ცდა“.
ბაზების მართვა
ბაზები იმართება დაინსტალირებულ პროგრამაში: „პარამეტრები“ → „მონაცემები“ → ბარათი „ბაზები“ (მხოლოდ ადმინისტრატორისთვის). ბარათის თავში ოთხი ღილაკია:
| ღილაკი | რას აკეთებს |
|---|---|
| სერვერების კონფიგურაცია | ხსნის ფანჯარას, სადაც ჩანს ამ კომპიუტერის ბაზები, შენახული და ქსელში ნაპოვნი სერვერები |
| ქსელში ძებნა | ეძებს ლოკალურ ქსელში სხვა კომპიუტერების ბაზებს |
| არსებული ბაზის დამატება | სიაში ამატებს სხვა საქაღალდეში (მაგალითად სხვა დისკზე) არსებულ ბაზას |
| ახალი ბაზა | ქმნის ახალ, ცარიელ ბაზას |
სიაში თითოეულ ბაზასთან ჩანს: სახელი, ნიშნები („გახსნილია“, „სხვა საქაღალდე“), ქსელის მისამართი („ქსელში: 192.168.1.10:3030“ ან „ქსელში არ ჩანს · პორტი …“), საქაღალდე, მონიშვნა „ქსელში ყოველთვის“, საქაღალდის გახსნა, სახელის შეცვლა და „გახსნა“.

ახალი ბაზის შექმნა
- დააჭირეთ „ახალი ბაზა“.
- ჩაწერეთ „სახელი“ (მაგალითად „ფილიალი ვაკე“).
- აირჩიეთ, სად შეიქმნას: „სტანდარტული ადგილი“ ან „საქაღალდის არჩევა…“ (მაგალითად სხვა დისკი; ქსელური დისკი არ გამოდგება).
- დააჭირეთ „შექმნა“ — „„…“ მზადაა. გავხსნა ახლავე? შესვლა: admin / 1111, მენეჯერი 2222, მოლარე 3333 (შემდეგ შეცვალეთ).“

ამ კომპიუტერის ლიცენზია ახალ ბაზასაც მიჰყვება. Activi POS-ში ახალი ბაზა ყოველთვის ცარიელია (დემო მონაცემების ვარიანტი აქ არ არის). ახალი ბაზა ქსელში პორტით 3040-დან ზემოთ ჩანს.
ბაზის გახსნა (გადართვა)
დააჭირეთ სასურველ ბაზასთან „გახსნა“ და დაადასტურეთ. პროგრამა გადაიტვირთება და გაიხსნება არჩეული ბაზა. წინა ბაზა ადგილზე რჩება — არაფერი იშლება და არაფერი გადაიტანება.
ყურადღება: ბაზის წაშლა პროგრამიდან შეუძლებელია. „სიიდან მოშორება“ (მხოლოდ სხვა საქაღალდეში არსებული ბაზებისთვის) ბაზას მხოლოდ სიიდან აქრობს — ფაილები ადგილზე რჩება.
„ქსელში ყოველთვის“
ჩვეულებრივ ქსელში ჩანს მხოლოდ ღია ბაზა. თუ ბაზასთან მონიშნავთ „ქსელში ყოველთვის“, ის ქსელისთვის ხელმისაწვდომი იქნება მაშინაც, როცა ამ კომპიუტერზე სხვა ბაზაა გახსნილი — ასე ერთი კომპიუტერი რამდენიმე ფილიალის ბაზას ემსახურება.
მნიშვნელოვანი წესები
- ბაზა არ შეიძლება იყოს ქსელურ (გაზიარებულ) საქაღალდეში — ორი კომპიუტერი ერთ ფაილს დააზიანებს. ბაზა შექმენით მთავარ კომპიუტერზე, სხვები კი ქსელით დაუკავშირდებიან.
- ქსელში ძებნისთვის ყველა კომპიუტერი ერთ ლოკალურ ქსელში უნდა იყოს. Activi POS-ის ბაზა ქსელში მუშაობს TCP პორტზე
3030(დამატებითი ბაზები —3040-დან ზემოთ), ძებნა კი იყენებს UDP პორტს3029. თუ Firewall ბლოკავს, სალარო მთავარ კომპიუტერს ვერ იპოვის. - თითოეული სალარო ლიცენზიის ერთ სამუშაო ადგილს იკავებს (თავი ლიცენზია).
ვერ იპოვეთ პასუხი? დააჭირეთ პროგრამაში დახმარების ღილაკს, მოგვწერეთ ან დაგვირეკეთ: +995 322424022.