მონაცემთა ბაზები და რამდენიმე სალარო ქსელში

Activi POS-ის ყველა მონაცემი — პროდუქცია, გაყიდვები, თანამშრომლები, ბუღალტერია — ინახება მონაცემთა ბაზაში. ბაზა ერთ კომპიუტერზეა, მაგრამ მასზე ერთდროულად რამდენიმე სალარო შეიძლება მუშაობდეს ლოკალური ქსელით.

ძირითადი ცნებები

• ბაზა — ერთი ბიზნესის ან ფილიალის ყველა მონაცემი. თითოეული ბაზა ცალკეა: საკუთარი პროდუქციით, თანამშრომლებით და ბუღალტერიით.
• მთავარი კომპიუტერი — სადაც ბაზა ინახება. ის უნდა იყოს ჩართული, როცა სხვა სალაროები მუშაობენ.
• სალარო (კლიენტი) — კომპიუტერი, რომელიც საკუთარ ბაზას არ იყენებს და მთავარ კომპიუტერს ქსელით უკავშირდება.

პირველ გაშვებაზე პროგრამა ამ კომპიუტერზე ქმნის „მთავარ ბაზას“ — ერთი სალაროს შემთხვევაში სხვა არაფერია გასაკეთებელი.

ბაზების მართვა

ბაზები იმართება დაინსტალირებულ პროგრამაში: „პარამეტრები“ → „მონაცემები“ → ბარათი „ბაზები“. ბარათის თავში ოთხი ღილაკია:

სიაში თითოეულ ბაზასთან ჩანს მისი ქსელის მისამართი, საქაღალდე და ღილაკები: „გახსნა“, სახელის შეცვლა, საქაღალდის გახსნა. ღია ბაზას აქვს ნიშანი „გახსნილია“.

ახალი ბაზის შექმნა

1. დააჭირეთ „ახალი ბაზა“.
2. ჩაწერეთ „სახელი“ (მაგალითად „ფილიალი ვაკე“).
3. აირჩიეთ, სად შეიქმნას: „სტანდარტული ადგილი“ ან „საქაღალდის არჩევა…“ (მაგალითად სხვა დისკი).
4. დააჭირეთ „შექმნა“. პროგრამა შემოგთავაზებთ ახალი ბაზის მაშინვე გახსნას.

ახალ ბაზაში შესვლა: admin / 1111 (მენეჯერი — 2222, მოლარე — 3333). ამ კომპიუტერის ლიცენზია ახალ ბაზასაც მიჰყვება. Activi POS-ში ახალი ბაზა ყოველთვის ცარიელია.

ბაზის გახსნა (გადართვა)

დააჭირეთ სასურველ ბაზასთან „გახსნა“ და დაადასტურეთ. პროგრამა გადაიტვირთება და გაიხსნება არჩეული ბაზა. წინა ბაზა ადგილზე რჩება — არაფერი იშლება და არაფერი გადაიტანება.

ყურადღება: ბაზის წაშლა პროგრამიდან შეუძლებელია. „სიიდან მოშორება“ (მხოლოდ სხვა საქაღალდეში არსებული ბაზებისთვის) ბაზას მხოლოდ სიიდან აქრობს — ფაილები ადგილზე რჩება.

„ქსელში ყოველთვის“

ჩვეულებრივ ქსელში ჩანს მხოლოდ ღია ბაზა. თუ ბაზასთან მონიშნავთ „ქსელში ყოველთვის“, ის ქსელისთვის ხელმისაწვდომი იქნება მაშინაც, როცა ამ კომპიუტერზე სხვა ბაზაა გახსნილი — ასე ერთი კომპიუტერი რამდენიმე ფილიალის ბაზას ემსახურება.

რამდენიმე სალარო ერთ ბაზაზე

1. მთავარ კომპიუტერზე Activi POS ჩართული უნდა იყოს. თუ Windows-მა იკითხა „Allow access“, დაადასტურეთ.
2. დააყენეთ Activi POS მეორე კომპიუტერზე (სალაროზე).
3. სალაროს შესვლის ფანჯარაში ველში „ბაზა / სერვერი“ აირჩიეთ მთავარი კომპიუტერი ჯგუფიდან „ქსელის სერვერები“. თუ ის სიაში არ ჩანს, აირჩიეთ „+ სერვერის დამატება…“, ჩაწერეთ მთავარი კომპიუტერის მისამართი (მაგალითად 192.168.1.10) და დააჭირეთ „დაკავშირება“.
4. პროგრამა გადაიტვირთება და სალარო მთავარი კომპიუტერის ბაზით იმუშავებს — იგივე თანამშრომლებით, პროდუქციით და გაყიდვებით.

იგივე შეიძლება უკვე შესულ სალაროზეც: „პარამეტრები“ → „მონაცემები“ → „ბაზები“ → „ქსელში ძებნა“. გამოჩნდება ფანჯარა „ქსელში არსებული ბაზები“ — დააჭირეთ საჭირო ბაზასთან „დაკავშირება“. მისამართის ჩაწერაც შეიძლება ველში „ან მისამართით“.

როცა კომპიუტერი სხვის ბაზაზე მუშაობს, ბარათში „ბაზები“ წერია „ეს კომპიუტერი მუშაობს სხვა კომპიუტერის ბაზაზე: …“ და ჩანს ღილაკი „ამ კომპიუტერის ბაზაზე დაბრუნება“.

ტაბლეტი ან ტელეფონი

მთავარი კომპიუტერის ბაზა იხსნება ბრაუზერითაც იმავე ქსელში: აკრიფეთ http://მთავარი-კომპიუტერის-IP:3030 (მაგალითად http://192.168.1.10:3030). ზოგი შესაძლებლობა (მაგალითად USB პრინტერზე პირდაპირ ბეჭდვა და დისტანციური დახმარება) მხოლოდ დაინსტალირებულ პროგრამაშია.

თუ მთავარი კომპიუტერი გამორთულია

სალარო ჩართვისას ცდილობს მთავარ კომპიუტერთან დაკავშირებას („მთავარ კომპიუტერს ვუკავშირდები…“) დაახლოებით 45 წამის განმავლობაში. თუ ვერ დაუკავშირდა, ის ხსნის საკუთარ ცალკე ბაზას და შესვლის ფანჯარაში აჩვენებს: „მთავარ კომპიუტერთან (…) კავშირი ვერ დამყარდა“. ამ ბაზაში თქვენი თანამშრომლები და პაროლები არ არის — ჩართეთ მთავარი კომპიუტერი, შეამოწმეთ ქსელი და დააჭირეთ „ხელახლა ცდა“.

მნიშვნელოვანი წესები

• ბაზა არ შეიძლება იყოს ქსელურ (გაზიარებულ) საქაღალდეში — ორი კომპიუტერი ერთ ფაილს დააზიანებს. ბაზა შექმენით მთავარ კომპიუტერზე, სხვები კი ქსელით დაუკავშირდებიან.
• ქსელში ძებნისთვის ყველა კომპიუტერი ერთ ლოკალურ ქსელში უნდა იყოს. Activi POS-ის ბაზა ქსელში მუშაობს პორტზე 3030 (დამატებითი ბაზები — 3040-დან ზემოთ), ძებნა კი იყენებს UDP პორტს 3029. თუ Firewall ბლოკავს, სალარო მთავარ კომპიუტერს ვერ იპოვის.
• თითოეული სალარო ლიცენზიის ერთ სამუშაო ადგილს იკავებს (თავი ლიცენზია).