ხშირი კითხვები და პრობლემების მოგვარება

თუ პრობლემა აქ აღწერილი არ არის, გამოიყენეთ პროგრამის ღილაკი „დახმარება“ (თავი დახმარება და დისტანციური მხარდაჭერა).

ბეჭდვა

პრინტერი არაფერს ბეჭდავს

ჯერ შეამოწმეთ „პარამეტრები“ → „ინტეგრაციები“ → „ჩეკის პრინტერი“ → „ბეჭდვის რეჟიმი“. „Windows-ის დრაივერით“ რეჟიმში ჩეკი იბეჭდება Windows-ის ნაგულისხმევ პრინტერზე — დარწმუნდით, რომ ნაგულისხმევად სწორედ ჩეკის პრინტერია არჩეული (Windows → პარამეტრები → პრინტერები). USB და ქსელურ რეჟიმში დააჭირეთ „ტესტური ბეჭდვა“. ასევე შეამოწმეთ, რომ პრინტერი ჩართულია, ქაღალდი აქვს და კაბელი შეერთებულია.

ქსელური პრინტერი წერს „პრინტერი არ პასუხობს“ ან „კავშირი ვერ დამყარდა“

შეამოწმეთ პრინტერის IP მისამართი (მას ჩვეულებრივ პრინტერი ჩართვისას ან ღილაკით ბეჭდავს) და პორტი — ჩვეულებრივ 9100. კომპიუტერი და პრინტერი ერთ ქსელში უნდა იყოს. თუ როუტერი მისამართს ცვლის, პრინტერს მუდმივი (სტატიკური) IP მიანიჭეთ.

ჩეკი ძალიან განიერია ან ტექსტი იჭრება

USB და ქსელურ რეჟიმში აირჩიეთ სწორი „ქაღალდის სიგანე“ — 58 მმ ან 80 მმ, თქვენი ლენტის მიხედვით. „Windows-ის დრაივერით“ რეჟიმში ქაღალდის ზომა იცვლება პრინტერის დრაივერის პარამეტრებში (Windows-ში, პრინტერის „ბეჭდვის პარამეტრები“).

ჩეკი ავტომატურად არ იბეჭდება

ჩართეთ „პარამეტრები“ → „მაღაზია“ → „ავტომატური ჩეკის ბეჭდვა გადახდისას“. გამორთულ მდგომარეობაში ჩეკი იბეჭდება მხოლოდ ღილაკით „ბეჭდვა“.

ფულის უჯრა არ იხსნება

უჯრა იხსნება მხოლოდ USB ან ქსელური ბეჭდვის რეჟიმში, მონიშვნით „ბეჭდვისას ფულის უჯრის გახსნა“, და უნდა იყოს შეერთებული ჩეკის პრინტერთან. შეამოწმეთ ღილაკით „უჯრის გახსნა“.

მაღაზიის მისამართი და ს/კ ჩეკზე არ იბეჭდება

შეავსეთ „პარამეტრები“ → „მაღაზია“ → „მისამართი“, „ტელეფონი“ და „საიდენტიფიკაციო კოდი (ს/კ)“ და დააჭირეთ „შენახვა“.

სკანერი და სასწორი

სკანერი არაფერს ამატებს ჩეკში

სკანერი უნდა მუშაობდეს კლავიატურის რეჟიმში (USB HID) და კოდის ბოლოს Enter-ს აგზავნიდეს — ასეა ქარხნულად თითქმის ყველა სკანერზე. შეამოწმეთ ჩვეულებრივ ტექსტურ რედაქტორში (Notepad): სკანირებისას კოდი უნდა დაიწეროს და კურსორი ახალ სტრიქონზე გადავიდეს. სალაროზე ველზე დაჭერა საჭირო არ არის, მაგრამ სკანირება არ მუშაობს, როცა გახსნილია გადახდის ან სხვა ფანჯარა.

სკანირებისას წერს „პროდუქტი ვერ მოიძებნა“

ამ შტრიხკოდით პროდუქტი კატალოგში არ არის. მოძებნეთ პროდუქტი დასახელებით და მის ბარათში დაასკანერეთ შტრიხკოდი ველში „შტრიხკოდი (EAN-13)“, ან შექმენით ახალი პროდუქტი.

სასწორის ეტიკეტი არ იკითხება

შეამოწმეთ „პარამეტრები“ → „ინტეგრაციები“ → „სასწორი“: ჩართულია „სასწორის შტრიხკოდები“ და „შტრიხკოდის პრეფიქსი“ ემთხვევა სასწორის ეტიკეტის პირველ ციფრებს. შეტყობინება „სასწორის შტრიხკოდი ვერ მიება პროდუქტს“ ნიშნავს, რომ ეტიკეტში ჩაწერილი პროდუქტის კოდი კატალოგში ვერ მოიძებნა.

ქსელი და რამდენიმე სალარო

სალარო მთავარ კომპიუტერს ვერ პოულობს

1. შეამოწმეთ, რომ მთავარ კომპიუტერზე Activi POS ჩართულია.
2. ორივე კომპიუტერი ერთ ქსელში უნდა იყოს (ერთი როუტერი).
3. მთავარ კომპიუტერზე Windows Firewall-მა არ უნდა დაბლოკოს Activi POS — თუ ჩართვისას ნებართვა იკითხა, დაადასტურეთ „Allow access“.
4. ქსელში ძებნის ნაცვლად ჩაწერეთ მთავარი კომპიუტერის მისამართი ხელით (შესვლის ფანჯარა → „ბაზა / სერვერი“ → „+ სერვერის დამატება…“, მაგალითად 192.168.1.10).

დეტალურად — თავში მონაცემთა ბაზები.

სალაროზე თანამშრომლები და პაროლები „გაქრა“

სალარომ მთავარ კომპიუტერს ვერ მიაგნო და საკუთარი, ცარიელი ბაზა გახსნა — შესვლის ფანჯარაში წერია „მთავარ კომპიუტერთან (…) კავშირი ვერ დამყარდა“. მონაცემები არ დაკარგულა: ჩართეთ მთავარი კომპიუტერი, შეამოწმეთ ქსელი და დააჭირეთ „ხელახლა ცდა“.

შესვლა და ლიცენზია

სწორი პაროლი არ მიიღება

შეამოწმეთ კლავიატურის ენა და Caps Lock — შესვლის ფანჯარა ამაზე გაფრთხილებთ. ხუთი არასწორი ცდის შემდეგ ანგარიში 15 წუთით იბლოკება; ადმინისტრატორს შეუძლია ბლოკი მოხსნას გვერდზე „თანამშრომლები“ („ბლოკის მოხსნა“).

ადმინისტრატორის პაროლი დამავიწყდა

თუ სხვა ადმინისტრატორი არსებობს, მან შეცვალოს პაროლი გვერდზე „თანამშრომლები“. თუ არა — დაუკავშირდით Activi-ის მხარდაჭერას.

პროგრამა დაიბლოკა: „საცდელი პერიოდი დასრულდა“ ან „პროგრამა დაბლოკილია“

საჭიროა მოქმედი ლიცენზია. ადმინისტრატორმა იქვე ჩაწეროს ლიცენზიის კოდი და დააჭიროს „ლიცენზიის მიბმა“. თუ კოდი უკვე მიბმულია და ლიცენზია განახლდა, დააჭირეთ „ხელახლა შემოწმება“ (ინტერნეტი საჭიროა). მონაცემები ბლოკისას არ იშლება. იხილეთ თავი ლიცენზია.

გაფრთხილება „ლიცენზიის სერვერთან კავშირი არ არის“

პროგრამა ლიცენზიას დიდი ხანია ვერ ამოწმებს. შეაერთეთ კომპიუტერი ინტერნეტთან — შემოწმება თავისით მოხდება (ან „პარამეტრები“ → „ლიცენზია“ → „გადამოწმება“). თუ ოფლაინ დღეები ამოიწურება, პროგრამა დაიბლოკება.

„ამ კომპიუტერისთვის ადგილი არ არის“

ლიცენზიის სამუშაო ადგილები შევსებულია. შედით მთავარი კომპიუტერიდან და „პარამეტრები“ → „ლიცენზია“ → „კომპიუტერები (სამუშაო ადგილები)“ მოხსენით კომპიუტერი, რომელიც აღარ გამოიყენება — ან დაგვიკავშირდით ადგილების დასამატებლად.

გაყიდვა და სალარო

ბარათიდან თანხა ჩამოიჭრა, ჩეკი კი არ გატარდა

ინტეგრირებულ ტერმინალზე დამტკიცების შემდეგ აუცილებელია „გადახდის დადასტურება“. თუ ფანჯარა მანამდე დაიხურა, გაატარეთ იგივე ჩეკი თავიდან და გადახდისას აირჩიეთ ბარათი ხელით ტიპის ტერმინალით (თუ ასეთი გაქვთ) — ან დაუკავშირდით მხარდაჭერას.

დღე თავისით დაიხურა

ღია დღე ავტომატურად იხურება შუაღამისას („ავტომატური დახურვა 00:00“). ეს ნორმალურია — შემდეგი გაყიდვა ახალ დღეს გახსნის.

მოსალოდნელი ნაღდი არ ემთხვევა სალაროს

მოსალოდნელ ნაღდში ითვლება მხოლოდ ნაღდი გაყიდვები, ნაღდი დაბრუნებები და „ნაღდის შემოტანა / გატანა“. თუ სალაროდან ფული გაიცა ხარჯზე ან მომწოდებელზე, ან მომხმარებელმა ნისია ნაღდით დაფარა, ეს ოპერაციები „სალაროს დახურვის“ გვერდზეც გაატარეთ.

პროდუქტს მარაგი აქვს, მაგრამ სალარო წერს „მარაგში არ არის“

სალარო მარაგზე მეტის გაყიდვას არ უშვებს. შეამოწმეთ პროდუქტის ნაშთი გვერდზე „მარაგი“ და, თუ საჭიროა, გაატარეთ საქონლის მიღება ან ინვენტარიზაცია.

საათი არასწორ დროს აჩვენებს

პროგრამა დროს ზუსტი დროის სერვერით ამოწმებს. მდგომარეობა ჩანს „პარამეტრები“ → „მონაცემები“ → „დრო“. თუ ინტერნეტი არ არის, გამოიყენება კომპიუტერის საათი — გაასწორეთ ის Windows-ში.

მონაცემები

როგორ გადავიტანო პროგრამა ახალ კომპიუტერზე

ძველზე ჩამოტვირთეთ სარეზერვო ფაილი, ახალზე დააყენეთ პროგრამა და აღადგინეთ ფაილი, ლიცენზიის გადასატანად კი დაგვიკავშირდით. ნაბიჯები — თავში ბექაპი და აღდგენა.

შეცდომით გატარებული ჩეკი წავშალო?

გატარებული ჩეკის წაშლა შეუძლებელია — დააბრუნეთ ის გვერდიდან „გაყიდვები“ (თავი დაბრუნება და გაუქმება).