გვერდი „ფასების სიის იმპორტი“ („მომწოდებლის Excel / CSV: ახალი ნაწილები, ფასები, მარაგი მომწოდებელთან, OEM ნომრები“; ადმინისტრატორი და მენეჯერი) მომწოდებლის პრაისს პროგრამაში ტვირთავს.

ყურადღება: ფასების სია მიწოდება არ არის. ის ქმნის ახალ ბარათებს (მარაგით 0), ამატებს OEM ნომრებს და ინახავს მომწოდებლის შეთავაზებას (მისი ფასი და მისი ნაშთი). თქვენს მარაგსა და თვითღირებულებას არ ცვლის — საქონელი მარაგში შედის მიღებით ან RS.ge-ს ზედნადებით (თავი საწყობი). გასაყიდ ფასს ცვლის მხოლოდ მაშინ, თუ ამას მოითხოვთ.

ფაილი

.xlsx (პირველი ფურცელი) ან .csv / .txt (გამყოფი ;, მძიმე ან ტაბი).
ფაილის თავში სათაური (მაგ. „ფასების სია 03.10.2026“) შეიძლება იყოს — სვეტების სათაურად ითვლება პირველი სტრიქონი, რომელშიც ორი ცნობილი სვეტი მაინც არის.
სვეტები სათაურით იცნობა:

სვეტი	იცნობს სათაურს (მაგალითები)	სავალდებულო
ბრენდი	ბრენდი, მწარმოებელი, Brand, Make, Производитель, Бренд	—
ნომერი	ნომერი, კოდი, Article, Number, Code, Part, SKU, Артикул	✓
დასახელება	დასახელება, Name, Description, Наименование	ახალი ნაწილისთვის
ფასი	ფასი, Price, Цена	✓
რაოდენობა	რაოდენობა, მარაგი, Qty, Stock, Остаток, Наличие	—
OEM	OEM, Оригинал, Cross	—

რაოდენობაში >5 ან + მიიღება („მეტია“): >5 → 5, მხოლოდ > ან + → 10. OEM სვეტში რამდენიმე ნომერი იწერება მძიმით ან ;-ით.

იმპორტი ნაბიჯ-ნაბიჯ

„1. ფაილი და პირობები“ → „აირჩიეთ ფაილი“. ჩანს ფაილის სახელი და სტრიქონების რაოდენობა.
„მომწოდებელი“ — სავალდებულოა (სიიდან ან ახალი). ვისი ფასებია — მისი შეთავაზებად შეინახება; ახალი მომწოდებელი „მომწოდებლებში“ თავისით გაჩნდება.
„ფასი ფაილში“: „შესყიდვის“ (ნაგულისხმევი) ან „გასაყიდი“.
„ნამატი %“ — ახალი ნაწილის გასაყიდი ფასი = შესყიდვის × (1 + ნამატი). ცარიელი ველი = ნაგულისხმევი ნამატი „ავტონაწილების პარამეტრებიდან“ (35%). თუ ფაილში გასაყიდი ფასია, შესყიდვის ფასი ნამატით უკუ ითვლება.
„ახალი ნაწილების კატეგორია“ — ერთი კატეგორია ფაილის ყველა ახალ ნაწილზე (ან „— კატეგორიის გარეშე —“).
„არსებული ნაწილების გასაყიდი ფასიც განახლდეს“ — მონიშნეთ, თუ გინდათ, რომ არსებულ ბარათებს ფასი ფაილით (და ნამატით) შეეცვალოს.
„2. სვეტები“ — შეამოწმეთ, რომელი სვეტი რას შეესაბამება (A: Brand, B: Article…), საჭიროებისას შეცვალეთ; ქვემოთ ჩანს პირველი 6 სტრიქონი. „ჯერ არაფერი იწერება“.
„წინასწარი ნახვა“.

ფაილი pricelist-sanimusho.csv — 7 სტრიქონი, მომწოდებელი, შესყიდვის ფასი, ნამატი 35%, სვეტები ამოცნობილია

წინასწარი ნახვა

ზემოთ ოთხი ფილაა — „ახალი“, „შეცვლილი“, „უცვლელი“, „შეცდომა“ (დაჭერით სია იფილტრება) — და ღილაკი „გამოყენება (N)“. თითო სტრიქონზე: სტატუსი, ბრენდი/ნომერი, დასახელება (ახალ OEM-ით), ფასი (ახალზე — „გასაყიდი …“), მომწოდებლის ნაშთი და ცვლილება: „მომწოდებლის ფასი: 16,90 → 17,40“, „მომწოდებლის მარაგი“, „გასაყიდი ფასი“, „ახალი OEM“, „ბრენდი“, ან „ახალი ბარათი“.

სანიმუშო ფაილში:

სტრიქონი	რა მოხდა
Toyota 04152-YZZA6 · 17,40 · 35	შეცვლილი — მომწოდებლის ფასი 16,90 → 17,40, ნაშთი 40 → 35
Toyota 48520-47050 · 182,00 · 2	უცვლელი — იგივე ფასი და ნაშთი
Toyota 04465-47070 · 84,00 · OEM 04465-12592	შეცვლილი — „ახალი OEM: 04465-12592“
Toyota 90915-YZZE1 · 13,10 · 15	ახალი — ბარათი, გასაყიდი 17,69 ₾ (13,10 × 1,35)
Toyota 17801-0T020 · 21,50 · 6	ახალი — გასაყიდი 29,03 ₾
Toyota 43512-47040 · ფასი ცარიელი	შეცდომა — „ფასი არასწორია“
Toyota 28800-21050 · 298,00 · >5	შეცვლილი — ფასი 300,00 → 298,00, ნაშთი 2 → 5

შეცდომები: „ნომერი ცარიელია ან ძალიან მოკლე“, „ფასი არასწორია“, „იგივე ნაწილი უკვე არის სტრიქონზე N“, „ახალ ნაწილს დასახელება სჭირდება“. შეცდომიანი სტრიქონი უბრალოდ გამოტოვდება — დანარჩენი მაინც ჩაიწერება.

ბოლოს დააჭირეთ „გამოყენება (5)“ — „ფასების სია შემოტანილია · 2 ახალი ნაწილი · 3 განახლებული · 1 უცვლელი · 1 შეცდომით გამოტოვდა“.

როგორ პოულობს არსებულ ნაწილს

ნომრით (გამოტოვებებისა და ტირეების გარეშე), ბრენდის გათვალისწინებით: თუ ფაილში ბრენდი წერია, ჯერ იმავე ბრენდის ბარათს ეძებს. ერთ ფაილში 20 000 სტრიქონამდეა შესაძლებელი; ეკრანზე ჩანს პირველი 500.

სად ჩანს შედეგი

სალაროში — მარაგში არარსებულ ნაწილზე „მომწ. N“ (თავი სალარო);
ნაწილის ბარათზე — „მომწოდებლები“: ფასი, ნაშთი, თარიღი;
შეკვეთის ფანჯარაში — მომწოდებლების ღილაკები ფასით, ყველაზე იაფი ჯერ (თავი შეკვეთა მომწოდებელთან).

შენიშვნა: „ახალი ნაწილების კატეგორია“ ერთია მთელი ფაილისთვის — სხვადასხვა ტიპის ნაწილები (ფილტრი, ხუნდი) ან ცალ-ცალკე ფაილებით შემოიტანეთ, ან იმპორტის შემდეგ კატეგორია ბარათზე შეცვალეთ. ფაილიდან შექმნილ ბარათზე თვითღირებულება ფაილის ფასია ისე, როგორც წერია (დღგ არ გამოიყოფა) — პირველი მიღების შემდეგ ის მიღების ღირებულებით ჩანაცვლდება. ფასების სია „ერგება“-ს არ ავსებს.

ვერ იპოვეთ პასუხი? დააჭირეთ პროგრამაში დახმარების ღილაკს, მოგვწერეთ ან დაგვირეკეთ: 599127000.