პირველადი ჩეკი და გადახდა: ნაღდი, ბარათი, გადმორიცხვა, შერეული გადახდა

სტუმრები ანგარიშს ითხოვენ — მიმტანი ბეჭდავს პირველად ჩეკს, შემდეგ კი იღებს გადახდას; მაგიდა თავისუფლდება და ჩეკი „ჩეკებში“ ინახება.

პირველადი ჩეკი

1. გახსენით მაგიდა და დააჭირეთ „პირველადი ჩეკი“ (აქტიურია, თუ შეკვეთაში ერთი ხაზი მაინც არის).
2. ჩეკი იბეჭდება ჩეკის პრინტერზე — „პირველადი ჩეკი დაიბეჭდა“.
3. მაგიდა დარბაზის გეგმაზე ნარინჯისფერი ხდება — „ჩეკი გატანილია“, სამზარეულოს ეკრანზე კი ამ მაგიდას ნიშანი „ანგარიში მოთხოვნილია“ უჩნდება.

პირველად ჩეკზე იბეჭდება: რესტორნის დასახელება, მისამართი და ტელეფონი, სათაური „პირველადი ჩეკი“, მაგიდა, თარიღი და დრო, „მიმტანი: …“, ყველა კერძი (რაოდენობა × ფასი და ჯამი), „სულ“, „მ.შ. დღგ“ (დღგ-ს გადამხდელისთვის), წარწერა „ეს არ არის ფისკალური ჩეკი“ და ჩეკის ბოლო ტექსტი.

• თერმული პრინტერის (USB ან ქსელური) შემთხვევაში ჩეკი პირდაპირ იბეჭდება; „Windows-ის დრაივერით“ რეჟიმში იხსნება Windows-ის ბეჭდვის ფანჯარა (თავი პრინტერი, ფისკალური აპარატი და ტერმინალი).
• პირველადი ჩეკის ხელახლა დაბეჭდვა შეიძლება იმავე ღილაკით (მაგ. თუ სტუმრებმა კიდევ შეუკვეთეს).
• პირველადი ჩეკი შეკვეთას არ ხურავს და არც თანხას აღრიცხავს — ეს ხდება გადახდისას.

გადახდის ფანჯარა

შეკვეთის ეკრანზე დააჭირეთ „გადახდა“. იხსნება ფანჯარა „გადახდა“ — ქვესათაურში მაგიდის სახელი.

• „გადასახდელი“ — შეკვეთის ჯამი.
• გადახდის სახეები (დანომრილი 1, 2, 3…): „ნაღდი“, „ბარათი“ (ან თითოეული ბარათის ტერმინალი ბანკის სახელით, მაგ. „საქართველოს ბანკი (BOG)“, ქვეშ — „ხელით“ ან „ავტომატური“) და „გადმორიცხვა“. რომელი ჩანს, წყვეტს ადმინისტრატორი: „პარამეტრები“ → „მაღაზია“ → „გადახდის მეთოდები“. კლავიატურის ციფრი (1–9) შესაბამის სახეს ირჩევს.
• დამატებული თანხები — თითო ხაზი თითო სახეზე, ✕-ით მოსახსნელი.
• „გადახდილი“, „დარჩა“, „ხურდა“ — ცოცხლად ითვლება.
• მარჯვნივ — თანხის ველი (ზედ წერია არჩეული სახე), „ზუსტი“, სწრაფი თანხები (მომრგვალებული, მაგ. „70 ₾“, „100 ₾“), ციფრული კლავიატურა და „დამატება“.

შენიშვნა: რესტორნის მაგიდაზე ნისია (ვალით გადახდა) არ შეიძლება — „ნისია“ აქ არ ჩანს მაშინაც კი, თუ ის „გადახდის მეთოდებში“ ჩართულია.

ნაღდით გადახდა

1. „ნაღდი“ ნაგულისხმევად არჩეულია.
2. აკრიფეთ სტუმრისგან მიღებული თანხა და დააჭირეთ „დამატება“ (ან Enter), ან დააჭირეთ სწრაფ თანხას. „ზუსტი“ ამატებს ზუსტად დარჩენილ თანხას (ცარიელი ველით „დამატებაც“ — იგივე).
3. ფანჯარაში ჩანს „ხურდა“ — დაუბრუნეთ სტუმარს.
4. როცა „დარჩა“ ნულია, დააჭირეთ „გადახდის დადასტურება“ (ან Enter).

ზედმეტი თანხა მხოლოდ ნაღდით შეიძლება — სხვაობა ხურდაა.

გადახდის შემდეგ

იხსნება ფანჯარა „გადახდა წარმატებულია“: „68,00 ₾ მიღებულია“, „ჩეკი შენახულია“ (ან „ფისკალური ჩეკი №…“) და ჩეკის ასლი.

• „ბეჭდვა“ — ჩეკის დაბეჭდვა;
• „კარგი“ — ფანჯარა იხურება და ბრუნდებით დარბაზში; მაგიდა უკვე თავისუფალია.

თუ „პარამეტრები“ → „მაღაზია“ → „ავტომატური ჩეკის ბეჭდვა გადახდისას“ ჩართულია (ნაგულისხმევად ჩართულია), ჩეკი თავისით იბეჭდება და ფანჯარაც თავისით იხურება — ნაღდით გადახდისას ამ დროს იხსნება ფულის უჯრაც (თუ პრინტერის პარამეტრებში ჩართულია).

ჩეკზე იბეჭდება: რესტორნის ლოგო, დასახელება, მისამართი, ტელეფონი, ს/კ, ჩეკის ნომერი (CP-000144), თარიღი, „მოლარე“ (ვინც გადახდა მიიღო), კერძები, „სულ“, გადახდის სახეები, ხურდა, „მ.შ. დღგ“, ჩეკის ბოლო ტექსტი და ჩეკის ნომრის შტრიხკოდი. ერთი და იგივე კერძის რამდენიმე ხაზი ჩეკზე ერთად იწერება („კაპუჩინო 2 ც × 6,00“).

შენიშვნა: რესტორანში ცალკე ფანჯარა „დააბრუნეთ ხურდა“ არ ჩნდება — ხურდის თანხა ჩანს გადახდის ფანჯარაში („ხურდა“) და ჩეკზე.

შერეული გადახდა

ერთი ანგარიში შეიძლება გადაიხადონ რამდენიმე სახით (მაგ. ნაწილი ნაღდით, ნაწილი ბარათით):

1. „ნაღდი“ არჩეულია — აკრიფეთ ნაღდი თანხა (მაგ. 50) და Enter.
2. აირჩიეთ ბარათი (ან ტერმინალი) და დააჭირეთ „ზუსტი“ — ბარათზე დაემატება დარჩენილი თანხა.
3. დაადასტურეთ.

თითო სახეზე ერთი ხაზია: იმავე სახის ხელახლა დამატება მის თანხას ცვლის. ბარათზე ან გადმორიცხვაზე ჯამზე მეტს ვერ დაწერთ: „… — ზედმეტი მხოლოდ ნაღდით შეიძლება“.

რჩევა: თუ სტუმრები ანგარიშს თანაბრად ყოფენ, თითოეულის წილი ცალ-ცალკე გადახდის სახით მიიღეთ (მაგ. ერთი — ნაღდით, მეორე — ბარათით). ერთი ანგარიშის ორ ჩეკად დაყოფა 2.38-ში არ შეიძლება.

ბარათით გადახდა

თუ ტერმინალი პარამეტრებში არ არის დამატებული, „ბარათი“ მხოლოდ აღრიცხავს, რომ თანხა ბარათით გადაიხადეს — ტერმინალზე თანხას მიმტანი თავად კრეფს.

თუ ტერმინალები დამატებულია („პარამეტრები“ → „ინტეგრაციები“ → „გადახდის ტერმინალები“), გადახდის სახეებში თითოეული ტერმინალი თავისი სახელით ჩანს.

ხელით (ცალკე მდგარი) ტერმინალი

ფანჯარაში ჩანს „საქართველოს ბანკი (BOG): გადაახდევინეთ 44,00 ₾“ — „დადასტურების შემდეგ დააჭირეთ „გადახდა დადასტურდა“ — ჩეკი მაშინ გატარდება და ნაშთი ჩამოიჭრება.“

1. აკრიფეთ თანხა ტერმინალზე და დაელოდეთ დადასტურებას.
2. სურვილისამებრ ჩაწერეთ „RRN / ავტორიზაციის კოდი (არასავალდებულო)“.
3. დააჭირეთ „გადახდა დადასტურდა — ჩეკის გატარება“ — ჩეკი მაშინვე ტარდება.

ინტეგრირებული ტერმინალი

დააჭირეთ „ტერმინალზე გაგზავნა · … ₾“ — თანხა თავად მიდის ტერმინალზე („ველოდები ტერმინალს…“). დამტკიცებისთანავე ჩეკი თავისით ტარდება. ტერმინალის პასუხამდე ფანჯარა არ იხურება („ტერმინალი მუშაობს — დაელოდეთ პასუხს“); თუ დამტკიცების შემდეგ ფანჯრის დახურვას ცდილობთ, პროგრამა ჯერ ჩეკს ინახავს („ბარათით გადახდა დამტკიცებულია — ჩეკი ინახება“).

ყურადღება: რესტორანში ბარათი ჯერ ტერმინალზე იჭრება, ჩეკი კი მის შემდეგ ინახება. თუ დამტკიცების შემდეგ ჩეკი ვერ შეინახა (მაგ. „არასაკმარისი ინგრედიენტი…“), ფანჯარას ნუ დახურავთ: გაასწორეთ მიზეზი და ხელახლა დააჭირეთ „გადახდის დადასტურება“ — ბარათი მეორედ არ ჩამოიჭრება. თუ ფანჯარა მაინც დაიხურა, პროგრამა გაგაფრთხილებთ: „ჩეკი ვერ შეინახა — ბარათით დამტკიცებული … ₾ (RRN …) გააუქმეთ ტერმინალზე“ — გააუქმეთ ოპერაცია ტერმინალზე და მიიღეთ გადახდა თავიდან.

ფისკალური აპარატი

თუ ფისკალური აპარატი ჩართულია, ყოველი გადახდილი ანგარიში ავტომატურად იგზავნება აპარატზე და ჩანს „ფისკალური ჩეკი №…“. თუ აპარატი არ პასუხობს — „ფისკალური აპარატი: …“, მაგრამ ჩეკი პროგრამაში მაინც ინახება. დეტალები — თავი პრინტერი, ფისკალური აპარატი და ტერმინალი.

შეცდომები გადახდისას